B-Day @ 2011 – The happiest birthday, i think

個標題係英文，唔等於內容要用英文打既。

今日係 2011 年 9 月 29 日，即係我既生日，9 月 28 日既第二日
( 唔用翌日呢個字，因為... 我生日邊有咁「正式」姐 ! )，

街外既平均風速每小時 130 公里，正掛八號風球，學校停課。
因為咁，我先可以喺新高中中六「百忙中」抽到極珍貴既時間打字。

:(

9 月 28 日，一個連自己都會唔記得既日子，一個連生日都差啲唔記得既人，
居然會過到一個咁開心既生日，有啲始料不及，有啲手足無措，亦有啲感動。

「禮物啊 !」

首先 ? 當然要多謝咁多位送禮物同卡仔比我既朋友啦。
有老淇啦,琛哥啦,a.C啦,丁丁啦,LianneLam啦,陶子啦,菲菲啦,毛毛啦,波仔啦... ( 我有冇數少左?)
好多謝你地咁多位既心意吖，你地知唔知呢，我收到禮物果下真係會嚇一跳架，
無論你地係送一張卡仔，定係一件玩具，一本書，抑或一張鍾嘉欣... 我都會覺得好開心 !
多謝你地啊 !
放心啦，我會好好 keep 住所有禮物架啦 ( 除左老淇本 schedule 啦，我會不言敗 ! 我會好好用佢架啦)

得啦得啦，我都明白你地會覺得我寫得好普通... Sor - -!

有時真係想問 :「又生日呀你？」- (by 陶子)

九月份係一個好多人生日既月份，
亦都係一個經常補送生日禮物既月份 ( 因為七八月放假 今年補課多，例外啦咁 )。
所以朋友生日應該會攪到人「頭都大埋」... 因為又要買禮物，又要寫卡仔，而且錢又唔係多

多謝陶子張生日卡 : 佢道出左大家既心聲啊 !

「多謝咁多位記得我生日既人 !」

好明顯，9 月 28 日，唔會比其他喺日曆上既日子更顯眼。
但係，當我知道咁多人都記得我既生日，我真係感動...
無論係親口同我講, 用 SMS 講, 定係喺 facebook 講, 我都覺得好開心 :
因為我知道，你地係重視我架 !

另外一個小事，就係一個小學既同學 - Law Yan Yee , 都冇唔記得我生日
其實都幾 shocking but surprising :P

「…上天送比你第一份禮物，就係唔使返學」 - (by MakKwok)

事實上，生完日掛八號波，唔使返學，有冇令我特別興奮? 冇。
唔返學，唔返工，對好多人黎講，係一件不知幾好既事 ! 但係我就冇咩感覺...
有時望下自己，明明放一日假都做唔到咩野，反而更加空虛
有時睇到電視，講到有船撞到岸、有棚架倒塌，反而有啲心煩

冇動力既一日，係特別難過同難過......

忙碌的新高中

今日之後既日子，將會更加忙碌啦......
要開始準備考公開試、要開始預備學校測驗、要完成剩下既 IES、SLP、OLE、SBA ...
仲有數不盡既功課、練習。
喺呢個 blog 度呻既時間將會愈來愈少... 愈來愈少

所以，我冇 update 個 blog，唔等於我懶 !

記得曾經聽過一個道，講到 BUSY 係 Being Under Satan's Yoke 既簡寫...
希望我唔會啦 !

One more thing : 「OCP 考試考成點 ?」

我冇講大話，間考試中心既電腦係出唔到中文題目，令到原本考中文卷既我，要中斷考試。
可能呢個係上天比我最好既結果 ?
另一方面，我都唔打算再 reschedule 啦，自己已經盡過力，就等考完 DSE 先再算啦。

:)