今日由青衣緩步去走到葵芳，路線大致上由翠怡開始，由新都會終結。
翠怡花園，一個曾經陌生既地方……
一直經過，我想起三個人，西施，馬騮，丁丁。
想起西施，係因為佢喺翠怡住......
上次幫佢收書，雖然佢唔知道係唔係真係有錢收，亦都唔知係邊個比錢佢...
我呢，都一樣。唔知有冇報酬，但係都去左幫佢收書...
收書係 MK 既主意，可能 MK 都有一個現實扭曲力場，推動我地 ?
我都唔知，但係 MK 的確係有一種能夠令人將不可能變成可能既能力...
呢點係我欣賞佢既地方... 不過呢排大家少見左，下一秒究竟大家變成點... 已經慢慢模糊...
聽一首歌也是緣份，否則怎麼似共渡過患難......
想起丁丁，係因為佢曾經同我一齊去翠怡商場食飯，之後一齊搭 401 返屋企。
果年係水運，定係陸運會，我都唔記得啦... 我只記得因為佢，我先識搭 401 ...
不過既然我今日選擇行路，就要忘記 401 呢樣物體啦 :(
想起馬騮，令我回憶既，總係夜晚。
唔知呀，我又冇夜晚上過你屋企，又冇同你做過啲咩，但我回憶中既馬騮，背景總係夜晚。
最記得就係果陣一齊上M2 果陣上 facebook 睇女啦，
之後仲有洗 eason 啦，
之後就係唔開心既事了....
命運要安排我認識你，命運更要安排我去認識她，更要安排我行呢條路......
一起聽歌也是緣份，彷彿彼此已暴露過心事......
其實我真係有啲攰... 唔單止係講緊由青衣機鐵站行去翠怡，亦都係講緊我既內心...
我好想去抖一下... 想咩都唔再想，用心去讀書，用心去發展自己既電腦興趣...
我好清楚，路始終要走，我唔可以再停留喺翠怡，我要開始行去涌美路，再行去南橋，
如果唔係我就會註定浪費時間，一世都返唔到屋企，去唔到終點。
我知道，花喺呢件事上面既時間，絕對唔係浪費...
不過呢兩日，我終於真正地攰了，笑唔出了......
尋日同 Patrick 游水既時候不斷地想，令自己游到差點就暈低，連聲音都聽唔到...
... 冷靜一下啦。
往後會難適應，但可能係為左要走更遠既路 ?
不論結果如何，只想一切交托。
繼續行，就係青衣南橋。
見到一個九幾年既「機場發展計劃」路牌，突然想起第一次去青衣城，
以及第一次去香港國際機場既經過......
一家人既感覺真係好，可以一齊去行街，一齊去旅行 ( 可惜一直冇同過老豆去 )...
鼻子不其然地有點點酸起來。
已經想唔到幾多，依家既目標，只係想比到家人最好既一份禮物...
或者，要送呢份禮物，我仍要繼續努力，做好見證。
終於走到貨櫃碼頭附近...
我突然想到了潘仔 Raymond 哥。
我都唔知點解會想起你，不過，我與你既認識，真係一場奇遇 :)
或者，係我從來都未見過一個好似你咁唔計較，唔自誇，冇戒心既人，
所以先咁快熟左 ? 或者係因為咩原因 ?
唔知呀...
一想起潘仔就想起阿 Nam 同麥君，可能係因為... 不打(雀)不相識掛 ?
同麥君同班過，但係只係 Hi Bye 過，
同阿 Nam 冇同過班，印象中只係1. 講野好大聲，同埋2. 個樣好得意。
最後可以變成好朋友，真係唔簡單啊...
一齊唱 K，一齊合唱，一齊玩 !
合唱中，你可想到了那段年代......
咁當然要多謝一個人啦 : 可愛小.... ;)
最終行到去新都會，
MK，你再次成為主角...
你帶我走過既每一段路，去過既每一個地方，我都歷歷在目。
雖然你講野成日都唔中 point，而且爆分鐘可能都同你有關... 但係...
你真係好獨特，好難得。
一聲聲，每個字，似記得一輩子......
想到呢度，我既思緒開始停了，
可能係人生經歷太少，根本冇野值得我再去想...
也可能係我既人生有唔多唔少都喺 TK 上面建立... 雖然冇再聯絡，但永遠記得你
也可能係我真係攰了...
如動心的不只是回憶，多精彩......
我想靜一靜，然後努力考好星期五既奧數考試。
PS : 助養兒童計劃已經到期，9 月會再決定是否續養，
我想呢一位受助既小朋友健康成長，唔想佢再次跌入貧窮...
希望可以再搵到人可以一齊分擔助養費啦...
沒有留言:
發佈留言