動物機網絡工程

將打印機搬返好，將年半前買落既書架重新裝過，其實，都幾難。

將接近十公斤既中學課本搬出書架，之後將寶寶既動物機搬入去。
之後裝 iATKOS 但因為 CPU 唔夾而失敗，
所以最後死死氣用返 Windows 7。

開 Networked Printer Sharing 由 Windows 連去 Mac 用左我半個鐘，
Set Scanner Sharing 整左個零鐘都失敗，最後行 FTP 算數。
順便裝埋 AppServ 做 HTTP Server，
之後剪駁 LAN 線用左我半個鐘，
執線用左我個半鐘。

一個幾十尺既地方，
要執兩部電腦，一個打印機，一個書架，十幾公斤書，
其實都幾辛苦。

途中比呀哥點左落街買野食，
上到石籬先知間野冇開，之後買野果陣仲比個肥婆鬧左幾句，
唔太開心。

—最後，我發現我忘記左呢個靜左音既電話。
可能係 MK 打比我用左半個鐘，令我潛意識想 ignore 部電話？
定係我執野既時候太累...？

我可以肯定自己既心有她，只係，我身體冇拎起手機查短信。

或者呢啲事都唔係第一次。
有次手機冇電，最後連她喺銅鑼灣打黎求救我都唔知。
有次手機唔拎得出黎，最後去完個 BBQ 佢都唔知發生咩事。
有次手機較左無聲，聽唔到佢一個重要電話。

「點解每次我最需要你既時候，你都會失蹤唔喺度？」
兩次。無法忘記呢句說話，因為，我的而且確將手機放低在一旁。
只係，每次我都無心失蹤，
或者，當我努力地等你電話既時候，電話根本冇響過。

改變？我好努力試過，但每次都失敗告終。

試過因為怕手機再無電，去幫部 S1 買一粒大容量電池，
最後我換左 S2。

試過因為怕手機唔識響，去較一個難聽又老餅既鈴聲，
最後我因為要返教會，較左靜音。

試過因為唔想再令你走失，而偷偷地行喺你後面，
最後比你發現左，唯有笑笑口。

試過因為怕搵你唔到，偷偷喺你部手機開 Location，
最後因為你怕食電，所以被你關左。
（其實，我有一晚都係靠 Location，先知邊度係天晶館）

試過叫你用 Google Talk，等我知道你手機有冇電，
最後你根本冇用過。

算啦，回憶過去又有何用呢？
我諗，我要繼續努力，因為我唔可以比你再走失。