一直在追求的。大學學位

今日上 Instagram 既時候，見到有張潮童相，comment 話要努力考入 U。
令我諗起入大學既迷思：
睇到有人要副學士過三爆四入大學，
聽到好多副學位既朋友抱怨入大學無望，
見到港台鏗鏘集又有一班學生覺得入唔到大學，話自己「見唔到前途」，
聽到人講入唔到大學就等於失敗⋯⋯

見到今屆 DSE 考生個個考到汗流浹背，
為左入大學，補習社使盡渾身解數，
貼中試題不在話下，
就連值人仔 39 蚊既收音機，都可以變成「全攻型收音機」。

見到咁既情況，我想問：大學既四年，到底代表啲咩？
因為讀多四年書，你會變得成功？會變得地位超然？
還是，因為一個學位，你會被受重視？
抑或，只係因為個個都讀大學，自己唔想「睇落輸蝕」？

如果正如鏗鏘集個女仔咁講，入到大學等於見到前途的話，
點解有人讀完四年大學可以失業？

如果今時今日既大學學位等於成功，而入唔到就等於失敗的話，
點解大學生既四仔主義保證（按：車仔，屋仔，老婆仔，細佬仔）不再復現？
點解入唔到大學既成功人士咁多？

今日既大學，只係一個有高度自由，讓你可以按興趣去裝備自己既地方，
想學工程、文學、商業理論⋯⋯都可以喺大學學到，
但學完之後，成功與否，始終都要靠學生自己識唔識運用。
反正，成功，一向都係需要自己既努力。
大學學位，只係一個看似好好既虛名，實質都只係一個學位。
要成功，總要靠自己努力，大學夢唔會係捷徑。

入到大學既，唔好自視過高，入唔到既，亦唔到太過妄自菲薄。
始終總有人係讀書叻，有人係做其他野叻。

突然，我想起 MK ，
佢冇入大學，但搵既錢比我多，亦比某啲想上莊既同學顯得仲有領導力。

所以？我講完啦。