Think Different

原本早上想上黎打下字，點知變左打其他野，壞習慣一直存在，需要努力去改。

今日一早起身超大雨，所以原本既單車大計都要告吹。

自己一個喺屋企，唯有做下鍵盤戰士，吹幾隻字。

尋日，我喺屋企睇左一套戲（My Name is Khan），

之後再同自己第一個組員（Ken）去睇多套戲（X-Men），

爆谷幾好味，電影內容都幾有趣，陣間再講。

今日，我見到蘋果電腦既 TextEdit icon 有一堆字，我細心地望，似乎係一篇文章。

當我再將個 icon 放大⋯⋯我發現到以下呢篇文：

Here's to the crazy ones. The misfits. The rebels. The troublemakers. The round peg in the square holes. The ones who see things differently. They're not fond of rules. And they have no respect for the status quo. You can praise them, glorify them or vilify them…

呢一段內容，正正就係 Apple 既其中一輯廣告《Think Different》既旁白講稿。當中，我最鍾意最後果一句：
「About the only thing you can't do is ignore them. Because they change things.」

暫時想唔到可以點講我既感想，不過呢一篇稿既氣勢好磅礡，同埋幾中肯：冇人可以忽略改變世界既人，例如馬丁路得金？

講返尋日套 My name is Khan，係一套關於 911 之後，美國人敵視穆斯林既情況。
故事主角係一個有自閉症既穆斯林信徒，自小受到母親既一個教訓：

「世界上只有兩種人：圖中上面有人揸住支棍，代表壞人。而下面有一個人，揸住支糖，代表好人。不論任何宗教、膚色、國籍，都一樣有好人同壞人兩種人。而呢一個，正正係人與人唯一既不同之處。」

故事主角一直都生活得好好，因為想過更幸福既生活，所以更由印度搬去美國生活。之後佢更加認識左一個佢生命中既「天使」，之後一齊結婚組織家庭。

不過， 所有既事情都因為一次既 911 而改變。
故事主角並唔係 911 既遇難者，相反只係無辜既一名美國公民。不過，因為佢既信仰，同拉登所提既「聖戰」扯上關係，佢開始被人排斥、敵視。妻子失去工作、兒子甚至在校被欺凌至死⋯⋯所以，佢開始左一段尋找美國總統，以求清白既一段路程。而路途當中，佢不但揭發同教教友組織既恐怖襲擊、更加拯救左無數既風災受害居民⋯⋯

當中有一個地方，亦讓我感到不寒而慄。

其中有一次，主角原本希望可以透過一次為非洲兒童籌款既活動，可以同總統有一次進餐既機會。所以，佢用自己既一雙手，幫人去整電器同整車，辛辛苦苦賺左五百蚊美金去交入場費。

不過，當佢去到接待處既時候，佢卻係被拒絕招待，原因係個活動「只為基督徒而設，籌款比非洲既基督徒」，所以佢唔應該參加。

我覺得，最令我不寒而慄既，並唔係當世一啲專門比基督徒既活動，又或者基督徒既個人見證。最令我心寒既，係教外人睇基督徒既睇法。

顯然地，呢個電影主要圍繞既，並唔係基督徒，但從呢個小鏡頭，可以見到導演覺得基督徒，係一種拒人於門外，卻自以為得救，但又虛偽既人。

身處當世，我地冇辦法控制人地腦入面既思想，或者係一啲佢對宗教、政見等既偏見。
但唯一一點，我地可以成為「好人」，用行動證明自己並唔係「道德塔利班」。