上海五天行

1. 坑爹的 TD-SCDMA 網

神舟一遊，最重要當然係買電話卡，因為如果走失左，或者跌左銀包，手機就會係唯一既求救工具。所以，我就一早在鴨記買左一張中港儲值卡。老板當時介紹我用聯通卡，不過以我所知，聯通冇自動翻牆服務，而且上網比移動卡貴得多。況且，既然我手頭上有一部支援中國制式 3G (TD-SCDMA) 既 iPhone 5S，所以不妨試一試中移動，再作定論。

一到埗上海，好快已經收到移動既訊號，而且幾分鐘後已經由 EDGE 變成 3G。感覺仍然良好。不過，一離開機場，我開始發現中國 3G 制式真係太過坑爹。

基本上，離開機場後，你只有一半機會成功用到 TD 3G 網，共餘大部分時間都會跌返落 2.5G。而且，移動 3G 既網絡時延值都頗高，通常都要 400ms，令到有好多時上網要重新整理一兩次，先至完整顯示到個網頁。整體來講，就係移動 3G 發展根本算不上成熟。

不過一讚就係移動 3G/2.5G + Opera 時，上網速度大提升。似乎移動有對 Opera 做手腳。而且，移動卡可以免翻牆上到 Facebook / LINE / Instagram etc.，所以只要手機支援中移動制式，其實買移動卡的確方便。＄70 一張儲值卡，有中港號碼仲要上到網翻埋牆，算係咁。

2. 參觀工廠

今次參觀左三間工廠，包括係 RS Components 既倉庫、TE Connectivity 同埋 embpapst 既生產線。整體而言都算係眼界大開。雖然以前已經參觀過半導體廠（dupont），但係都從來未見過一條完整既生產線。今次真係完全見到晒。而且，當我經過上海既保稅區，我仲見到好多其他知名度高既大型外資科技公司，例如 3M、IBM 等等。

當我想起香港既科技界，自己都覺得蒙羞。香港既大型公司，如果有一棟樓，一定係同金融行業相關，如果有兩層辦公室，已經好厲害。至於純科技公司呢？比較成功既通常會進駐數碼港或者科學園，而且通常都只有一層辦公室、或者係只有一兩個單位，甚至要寄居於工廠大廈。但上海根本唔係咁。

我都唔明白，點解科技咁重要，喺香港會變成被商科用黎吹水，然後被人輕視既行業。

3. 夜上海

唔好成日覺得，香港既夜景係世界知名，所以就巧威威，諗住香港仲長做長有。因為上海已經急起直追，甚至已經比香港既夜景更加有趣。晚上既上海，其實冇咁多所謂既「夜生活」（至於色情場所開到幾點，我就唔知啦）。相反，過左 10 點，上海大部分地方（遊客區都一樣）就已經開始變靜，上海人都返晒屋企瞓覺。香港人經常以為佢地會夜夜笙歌，其實只係 FF 出黎。而且，上海其實冇上海灘，只得個外灘。

我就去左呢個外灘見識下。只不過人真係有尐多。中國真係咩都冇，人最多。當日連影張相都幾難下：因為人真係太多。上海既外灘，連平日（我去果日係星期四）都多人到好似維港年初二咁。所以，當你見到呢個畫面，你好自然會覺得，其實尖沙咀都唔係真係咁多人姐？

至於你問我當地遊客既如廁文化水平點樣，我就照答你：就算去到邊，都係會有家長叫小朋友隨處便溺：至少飛機上我見到一袋童子尿，同埋南京街上有一灘尿漬。包唔包容，就睇你自己點睇。反正我就已經睇慣。

4. 禁食晚

行程去到最尾果晚，我收到學校寄黎既 Email，話我成功派左去台灣既國立中央 Exchange 半年。當下真係有點不安：因為我當初同神講過，我呢個 Sem 就去事奉，然後之後再抽過 summer exchange。但依家既情況，係我唔去就 disqualify，以後都冇得抽。所以，當我返到香港，我就同晟希分享呢件事，亦都響培靈會完左之後禁食一晚。

禁食一晚後，我發現到兩點，係我從來唔知道，可能係神想話我知既兩點：第一點係，「如果我想知神既心意如何，我要繼續努力掀開聖經」：我方才發現，自己已經冇讀經一個星期了。而第二點就係「其實我咁想離開香港，或多或少同我自己想逃避 movement 既人有關」。我一直唔敢承認呢一樣野，但係神在當晚的確地話我知：「你係」。

我開始發現，原來自己一直以為自己好擁戴 movement，好認同 movement 既行動。但事實上並唔係。我一直都想響 movement 入面成長，見證自己一步一步，成為耶穌既門徒。不過，我發現，雖然 movement 幫助過我同神建立更深厚既關係，但同時亦令我覺得太沈重。

雖然，我個人認同要遵行大使命，認同要廣傳福音，認同要倍增門徒，認同要在大學作主見證。不過，我發現自己原來應付唔到太多既事務⋯⋯ 去到一個點，係我覺得同 movement 既部分人相處既時候，我會覺得好有壓力，唔敢表達自己意見太多。甚至去到一個點，我唔肯定，呢一個群體，係咪真係可以讓我專注，並且校準事奉既目標，即係耶和華上帝，耶穌基督。因為當我投入 movement 事奉時，我雖然聽到好多「希望神使用」、「蒙神喜悅」，但係我無辦法從心去認同「神真係會使用」：因為我見到每一個人一面犯罪，一面事奉，甚至連我自己都一樣。以往我已經戒除左睇不良網頁、亂買野既習慣，但係今年，因為種種既壓力，我又再次回到當中。

記得我大一果一年，我決意犧牲左好多既興趣，去參加 Servant Team。當時我係心甘情願去做，因為當下我見到好多靈魂既需要。當我參加左一年之後，我真真實實地知道自己有何等蒙福，但同時我亦知道自己已經需要大重整。

派去台灣，其實或多或少可以估計到，因為一來我亂填果堆好似有三間台灣，二黎我連 cancel deadline 都過埋我先知可以無痛 cancel，三來我面試派膠呢件事同人分享完，個個都話我表現幾出位（但原本係想借機令自己冇機會去，就唔使選擇）。

我打呢篇野既時候，突然記得 YL 同我講過，如果我去果個地方，可以讓我靈命上成長，更親近神，更能實踐大使命，我就應該去，相反地，如果因此增加我離開神既機會，就唔應該去。所以，我剛記起，我完左面試之後，我同神立過約：
「如果我去 Exchange 會令我離棄神，我就決意唔去，亦請神你安排更好既比我。」

但今日，當我發現自己去完創啟，好想去另一個有華人既地方見識，
甚至前幾堂 Training 同羊圈、衝仔話想去台灣（可惜佢地根本唔想去），
而且經上海一行，發現自己識普通話⋯⋯
我發現其實答案一早在心中，只係我一直唔敢承認。

前一排，我不斷問神，點解呢個世界亂成咁，神的公義何在，神透過我今日既讀經（彼得後書，本身因為貪夠短而選讀，而且聞說內容精闢）就已經在兩處話我知答案，讓我重新去平靜自己（彼後 2:4-20, 3:9)，重新讓自己唔再對人有怨恨。我發現，神根本有聽我既禱告，只係我自己每一天，有冇用心去聆聽神既回應、有冇安靜、有冇專心去思想，以及有冇自我反省。今日，我決意將溫書既時間暫時放下，安靜用文字重整自己既內心，我先發現，其實一切神早就知道。

只不過，我依家就要諗下，如果我咁樣走半年，同工是否答應，而且睇下要點樣安排了。
願神一路帶領，讓我可以勇敢向晟希解釋吧。

當然，如果佢唔比我走的話，可能就係神要我上既另一課了？