開學前

久久冇落過筆，寫第一句真係好難。唯有用返幾個小標題，交代幾個小故事。

「煙霞」
呢個小標題講緊我既心情，同時令我想起容祖兒既一首歌「煙霞」。
首歌幾好聽架，不過唔係重點。
其實我係想講，我有時候會覺得有啲失望：當你認識一個人愈多，你愈會發現佢既缺點。
而當佢既缺點正正係你難以忍受既地方，你就會覺得好麻煩。

問題一：
我發現，一直以來，我喺教會有一個自以爲同佢關係非常好既朋友，自中學開始識、開始熟，經歷過好多片段。但當我發現，原來佢百足咁多爪：佢原來有好多好多好朋友，就例如佢生日有好多人主動揾佢、佢放假會同好多人周圍去... 相比之下，我自己除左佢之外，就只有megamind 既真巴打可以講到心事。呢刻我唔知點解，覺得自己好危險，覺得好唔舒服。

我都唔知係我妒忌人多朋友，定係真心覺得危險，因為有件事只有佢同megamind先知（有次佢好頹廢，我就講左一件事比佢知，令佢覺得自己經歷既難處其實比其他人更少，結果好鼓勵到佢，至少有效左一星期）。但後來我喺度諗，點解自己會因為想鼓勵一個世界仔而講件事？其實真係太 Risky...... 同時，我開始發現，原來我係接受唔到同世界仔做朋友？又或者，原來我呢個朋友係一個世界仔？

問題二：
同一個人。今日我唔小心放左佢飛機，因為我唔太肯定自己約左佢幾點。
之後佢就玩隔離戰術，故意唔同我接觸。我道左歉架啦，咁都冇計。
不過佢大把朋友，我頂盡得megamind，計落我其實蝕。


「Final Year Project」
講起FYP，其實暫時有點失望，因為進度太過強差人意。
感覺上，我並無能力推動組員開工。呢種無力感其實似曾相識，已經唔係第一次。
硬件方面，就開學都仲未決定到用咩 MCU。
軟件方面，暫時只做到 Smartphone App 既初步構思。

其實我處處去為 teammate 諗，驚佢地無能力、驚佢地無時間、唔介意做多，
但結果呢？似乎唔太可行。唉，原來我都係冇乜 leadership，

好啦，我暫時放手，睇下之後會變成點。

唔想打落去，完吧。