無故缺席、遲到、爽約

嗱，經過文憑浩劫洗禮既筆者，會先為三個詞語下一個人所皆知，少少白癡既定義：

無故缺席：官方性地夾好時間，但不加以通知就選擇唔出席。某程度上而言，非常唔尊重場合：「起碼都通知聲先啦」。

爽約：臨赴約前先取消，或者唔通知聲就失約。同缺席一樣，同樣令人唔方便，因為要對方臨時搵野做，都幾煩。

遲到，唔使講都明啦掛，人人都試過，就係冇準時赴約囉。

講都嘥氣既，因為只要唔係文盲都識啦？事先聲名：筆者唔係想呃稿費，因為寫網誌根本冇錢可賺⋯⋯咁即係點？

其實筆者今日想問既係，當社會不斷催逼住人準時既時候，你有冇發現，只要身邊有人遲到五分鐘，已經會被人無限上綱到同「無心裝載」同義；又或者原本約定一星期後既野，三四日前通知去唔到，已經算係「臨時爽約」；即使你有事先通知，但都一樣被人標籤成「無故缺席」⋯⋯ 當呢啲野慢慢變得合理化既時候，究竟係因為現代人對時間過於執著、係外在因素太多、抑或又係「社會既錯」？

又關智能手機事？！
有人會覺得，智能手機普及，令遲到變得愈來愈合理化，一個電話，就可以大條道理叫人等你半個鐘，連講 Sorry 咁落自己面既野都可以慳返。甚至電話都唔打啦，一個 WhatsApp 就可以臨時唔蒲頭。似乎智能手機真係鼓吹人爽約⋯⋯

同一件事，用另一個角度去睇，智能手機可以提供用時間上既彈性。如果你趕唔切出門口，但因為冇電話，就要令對方白白擔心，甚至要對方等上成個鐘⋯⋯ 只要你打個電話比對方，人地就可以唔需要擔心你，仲可以 Hi 埋個 Tea 先再會面⋯⋯ 咁係壞事抑或好事？

或者，事實在乎觀點與角度，孰對孰錯，難解難分。

問題癥結，在於執著？
「爽約」定義係咩？「遲到」幾多分鐘先算過份？或者種種情況，都在乎於每個人對時間既觸覺與執著：你執著於絕對準時，就唔希望有人遲到。

用筆者打個比方，筆者唔多介意同朋友約會既時候，對方遲三四個字；也不介意朋友約會前一日臨時取消。始終筆者身處香港社會，每個人都想用盡自己既時間，結果遲到也不自知，也無可厚非，所以筆者都偏向愈來愈隨和，但同時亦會令部分朋友反感。

筆者也相信，你若要執著於要求別人準時，自己亦請準時，否則只會招人話柄。

講起呢個題目，或多或少同筆者一個友人有關。時間觀念各人不同，朋友相處之道，若果沒有互相遷就，互相坦誠，只有互相指責的話，口裏稱兄道弟也統統枉然。