回想起當初決定考車，除左係因為覺得波仔揸車返科大好型之外，仲有一個好重要既原因。
就係想證明自己既能力，其實不比其他人差。
至少，我識揸車，可以自己決定去邊就去邊。如果要用人生既層面來講，就係自己可以決定自己既生命，唔想比任何野（包括但不限於教會、movement 甚至神）去限制自己。再屬靈尐去講，就係唔想比神掌管自己既生命。始終比佢管左三四年，覺得有點苦悶，想自己出走一下，其實我又覺得何罪之有。
所以，我就決定左去考車。不過，當我不斷努力去練習（我上左 30+ 節，正常人 2X 節已經考得車）、我就發現自己愈來愈緊張。因為當我不斷想學得掂，想轉波轉得更加順、想唔死火、想轉左轉右做得好⋯⋯ 我就做得愈來愈差。當我失敗過一次，就好似係證明緊自己係失敗，就好似同緊自己講「其實你根本冇天份揸車」一樣。向來，我反應力同速度都係比較慢，打開拍子 game 都係炒粉比較多，有 40 combo 基本上已經去到極限。所以當我做唔到，就會覺得自己有幾咁廢。當我覺得自己廢，我就愈會想用勤力去搭救。至少揸出街因為練得多，有返咁上下都冇咁柒吖嘛。但係無力感非常大：因為我今次做得好，下次都會因為上次既成功而有壓力：例如因為上次冇死火，今次都唔想死火，但係因為成日凝住凝住，就會瀨晒野，最後就 totally fail，死火＋溜後＋空波滑行，炒得仲應過 super junior（超級新手）。
基本上咁既情況都仲 pass 到泊位調頭，我都真係要感謝神。但係唔使講就一定 fail 丙部路試。某個星期日返到教會，肥祺問我考成點，我話 fail 左，之後肥祺話自己「油塘 1 take pass 啦，有幾難啫，咁都 fail？」。果下，其實個心都真係幾傷，因為當事實擺在眼前，我自己真係好柒廢，真係 fail 左，冇得唔認，冇得抵賴。要承認自己廢，其實真係幾難過。每日要為自己既廢而不斷去努力，將自己最廢果面掩飾，唔平安，唔開心，亦無信心繼續落去。
我記得自己當時信主既時候，我決定將眼前既成敗一一放低。當時，我不斷努力，不斷讀書、溫書、抄筆記、不斷去爭取全級第一，成功左三年。但直至 Patrick 入左黎讀書，我既第一被輕鬆搶走，當時既我同樣地要面對：承認自己比人廢、比人弱。但係當時我返教會，聽到有一篇既信息，提到每個人不斷去用比較、用世上賺取既事物去換來既平安，將不得長久；相反，若果人願意放下自己，唔單單專注成敗，而將自己既價值建立喺神創造自己的話，人既平安將會長久。最後，面對當時家庭、友情、學業三重失敗既我，我決定嘗試放下自己既驕傲自大，將生命主權放喺神既手中。繼而，我能夠重新建立自信、友誼、家人關係亦得和解，全因為我唔再執著成與敗、對與錯。我開始能夠真心去原諒別人、能夠真心去交朋友⋯⋯ 神就讓我心中有真正既平安，體驗到從心而發既喜樂。
今日，我發現其實自己都係阿寶。
今日我去考車，其實同樣地，我嘗試選擇唔讓我既信仰介入。因為我想再次證明自己有幾咁叻。唔需要靠神。但係，我再次接受唔到自己既失敗。我傷心，覺得不再平安。至少，我唔敢喺人面前認自己廢，唔敢同人講學左 30 節都仲係會空波滑行。詐詐帝同人講自己學得疏，其實都係為左讓自己心好過一點，起碼叫做有少少安全感。最後考車果陣壓力大到左腳幾乎麻痺⋯⋯
你們既靠聖靈入門，如今還靠肉身成全嗎？你們是這樣的無知嗎？
（加拉太書 3:3 ）前一晚，我向神祈禱，我就立即見到好多既「巧合」。靈修書中神要我「明白 12 門徒當中有些的確比較平凡」、instagram 中見到有人話「承認自己的平凡」 等等。我明白到，其實自己需要放下驕傲自大，看自己合乎中道，放下成敗。
我放下之後，雖然冇即刻由學神變車神，
但起碼我心中有平安，更願意投入學車、虛心學習。
－－－－－－－－－－－－－－－－－
其實學結他都一樣。
當我見到劉翔話自己學左冇三個月就即刻出黎司他、見到 Ready 話結他好容易，見到身邊（包括但不限於 EL）個個都話結他其實唔難，我同樣地害怕承認自己廢。
認真黎講，雖然我學得斷斷續續，但其實我 14 年 5 月左右已經開始學結他。學到依家手指都係好唔靈活，也許又係因為自己天生反應力同速度比較慢既關係，我一星期練半個鐘左右（甚至有段時間一星期練兩次，每次 1 個鐘），但係練到 12 月，手指都係好慢。
同樣既事情，如果我一早決定依靠上帝，放低自己呢尐成敗觀，也許今日既我早已經練成，至少我唔會因為挫敗感而唔想練、又或者唔敢問人、唔敢虛心求教。
－－－－－－－－－－－－－－－－－
希望當我再次離棄神、再次高舉自己既時候，我可以開呢篇 blog 比自己睇。
以史為鑒，提醒自己：
其實神比人既一切能力，唔係用黎高舉自己有幾咁叻，幾咁威水，
因為咁只會讓人跌入不安、恐懼之中。
唯有依靠上帝、放下成敗，才能夠讓自己有真正既平安與喜樂。
沒有留言:
發佈留言