「再次感觸」
今年既 AGM 好感動，我相信十年之後，我仍然會記住呢一次 AGM。今次既重點不在我，因為除左幫手遞禮物，我根本冇上過台。台下既我，一路睇，一路驚訝，一路感恩，一路覺得惋惜，心中百感交集⋯
首先 Jessica 同羊圈既 Prezi，條理清晰到令我覺得難以置信。我認為呢一次比阿吉去年任何一次 Vision Passing 做得更加震撼。雖然有一版，我唔敢肯定「以至」定係「以致」先係岩既寫法，但我幾乎係有生之年第三次（第一次係 Jasmine@1314 Jesus Week，第二次都係 Jasmine@1415 JW）會讚 movement 人既 presentation...
其次就係條片。同樣地，我唔知到底個 Final Cut 係咪老翻... 但我肯定呢條片令我感受到制片人（cj）既熱血同認真。首先，樽上面有油呢個做法非常創新，其次，拍片人冇多餘鏡頭令成件事失焦（除左 Raymond 攪左人地杯野），最後新 ST 企出黎果陣，條片同佢地既動作配合得好好⋯
相比起上年打手印，今年真係唔同了。今年既團隊中，每個人都成長左，更加多創意，更加敢夢想，更加有方向。我真係清楚見到佢地做緊乜，再唔係（好似我？）咁為交差而做。
想不到，老豆過身都唔敢喊既我，居然會因為小事而感觸。
「碰到挫折我未怕，哪怕你我會在哪」
其實我有一個恐懼，兩個遺憾。恐懼既係，六月我將會離開科大，開始一年既實習生涯，而我既同學，將會完成佢地既 Final Year。或者咁講，我番黎既日子，就係佢地畢業離開既日子。昔日，我會話自己唔介意冇得一齊影畢業相，但直到今日，我發現，原來我真係怕孤單。
兩個遺憾，第一就係「冇野留到喺 movement」，第二就係「冇組員上 Servant Team」。（我知，唔使咁唔開心，因為佢地將會係耶穌一生既工人吖嘛）但心中總有情意結。所謂「冇野留」，其實就係講緊我冇任何軟硬件留低... 例如片（我相信個 MV 應該唔會再用⋯）、活動（我相信下年唔會有讀經晨禱會⋯）等等。
情意結嘛，總係唔理性既。身為組長，我反而要吖深鼓勵返我轉頭，真有意思。
「埋怨神，嬲爆佢」
今日借部計數機比 MK，途中居然唔見左隻 shure se215 耳機。趕緊5份 deadline，精神恍惚既一刻，居然禍不單行。我真係忍唔住埋怨了。祈禱講粗口我相信冇咩人敢做，但我做左了。我打比 MK 叫佢幫手搵，亦好在佢搵得返。
每日思想神，經常侍奉，唔嫖唔賭未開苞既信徒，居然會無啦啦唔見野。最後，請求一個埋怨神，叫我唔好返教會既人幫手，居然會搵得返。當下，我真係唔識仲點樣「感恩」落去。
我開始明白 MK 點解會咁嬲神、咁想埋怨神。佢向神許願，祈完禱，好開心咁 Accept 大學 Offer，最後 Fail 一科，入唔到最重要既大學。
我努力戒淫詞妄語，期望神幫助我凡事亨通，最後居然無啦啦唔見左對差唔多成千蚊既耳機。但最後居然係「靠人」唔係「靠神」搵得返。
面對失落感，我發現自己唔能夠好似約伯咁有信心。我開始明白點解 MK 咁唔想返教會（仲叫我唔好返）。經過今次，我相信我對佢既理解多左。我唔會再怪佢對神冇信心，因為失去重要既野，的確難受。
「我的好處不在祢以外」
講尐開心野啦。我發現原來自己呢份 Internship，其實係真真實實地經歷神既帶領。昔日我祈禱神為我開路，佢真係開比我。仲比我唔使擔心個 FYP。
流程：
0. 我祈禱神，希望比我搵到份工
1. 喺 Career Center 見到份 Intern
2. Email 去報，佢好快叫我面試
3. 我暑假岩岩做完個 stm32 mp3 player 其中一 part
4. 面試冇遲到（感謝神）
5. 見到面，唔使講英文
6. 因為做過個 MP3 project，識答問題
7. 受聘，
8. 因為袁誠喺我隔離，佢講左一句說話，令我推左 MTR 面試
9. John John 突然主動問我一唔一齊 FYP
10. 入去發現我果個位係三代基督徒
11. 偶然比羊圈問下，佢居然識第一代基督徒...
難以置信如此巧合，我相信神再次鼓勵我。（我當下求神原諒我，唔再用粗口祈禱⋯）
結尾
既然神你如此真實，我再祈禱，求你帶領我喺「身份認同」既問題上，一路走落去吧。晚安。
沒有留言:
發佈留言