2017-12-12

咖啡因

又係一個瞓唔著既晚上，我懷疑自己今日吸收得太多咖啡因：因為我早上飲咗茶、下午又飲左杯幾濃既茶記檸茶。

或者係因為今年真係好多嘢要做（例如 FYP、讀書、教會、籌備同屋企人去既台灣人自由行），我呢幾個月的確飲多左好多茶，幾乎每兩日都會飲一次。令向來對咖啡因有少少敏感既我，開始有啲頂唔順。我開始多咗失眠（以前從來未試過）同轉數慢左。

而今晚既失眠，應該又係關飲茶事，不過就造就左呢篇 blog。

MTR Group Interview

星期五早上，我去左九龍灣既 MTR 總部見工。我覺得呢個地方好得意：當我入到去，我發現全部水牌同告示都係用地鐵入面果種字體（中英文都係）。另一方面，喺 Interview 既過程中，果度啲員工都好 nice，完全唔覺得有架子，感覺好舒服。同時感謝天父賜下平安。

喺 group discussion 期間，我都好努力去發言，但係我又見到其他人其實只係講過一兩次野。所以喺總結既時候，雖然我已經 jot 晒大部分既 point，但我都係決定邀請發言較少既人做總結。因為一來我知道佢比我更需要透過「總結」攞分（我發言次數多過佢），二來我唔想成組充滿競爭既心態，始終再見亦是朋友。

我好期望入到呢間公司架，但我做左呢件事唔知會唔會扣分、覺得我奇怪、唔進取...... 但點都好，都係交比天父安排啦，始終我好想佢帶領我行一條佢想我行既路。

FYP 

另一樣我好掛心既係 FYP。原本我以為 9-11 月果個 sprint 真係做得完心跳計、步計同藍芽。結果，我喺 12 月先發現原來心跳計出咗問題（量度值極唔準 + 度唔到手臂），而負責呢 part 既同學一直都冇出聲，直至我上星期親自發現。

我原本真係嬲嬲地，但我諗到：呢個同學又未做過 product r&d，諗得唔周到又有幾出奇？而且，向人求助其實都唔容易，始終人有自尊。所以，我都係決定原諒佢，唯有先專注去解決件事。我相信：Team spirit 比事情更重要，如果我燥左佢底，氣氛唔好，個 project 就好難做落去。

唔，希望呢個三月就要完成既 FYP，可以如期完成吧。

阿深的 ELEC3300 

兩星期前既晚上，組員阿深喺臨 3300 demo 前一晚揾我幫手。原來，佢 group mate 突然間 free ride 咗佢，而佢就用左咗兩晚既時間加班，但都整唔到 LCD 既 driver，所以就絕望到幾乎放棄。

當時，我決定幫一幫佢，重新插過啲線、用焊既方法固定啲電線、重寫過一部分既 driver... 最後總於著左。感謝主。

有一個畫面我好深刻。當時，阿深同我講：「我咁大個仔，從來都冇試過咁樣叫人幫我... 」我發現到，原來每個人都有佢唔想比人見到果面。佢唔想比人幫，可能係因為佢唔輸得。但佢都願意因為對我既信任，毫無保留地分享佢自己既軟弱。

果晚我好感動，令我覺得用再多既時間整都值得，我既能力其實只係好微小，但卻得到佢 *真誠* 既謝意同信任，我真係好感動。

附註

最近，我掉左幾件舊衫，想再次去向神立志要過新既生活、將我內心既矛盾再次抹走。但不出兩日之後，我已經覺得好可惜。我好肯定自己既問題，已經唔再係一時既衝動或者錯覺。但係，我 · 到底係咩？

我諗起 AT 講過 ：「人們甘心受到這種壓榨，也要走在一起。... 我們一面不斷地呼喊要尋找那失去的自己，一面逗留在這個令我們失去自己之地。」

或者，我可能都一樣。