呢個 Blog 最終都係要封密碼，
一來唔想畀人 Google 到，二來講得可以放啲。
有啲會傷害人、傷害自己名聲既說話，唔公開比較好。
講返正題先：
原來，我最後一年喺科大既日子，比我想像中難過好多。
至少，直至 2017 年 3 月 25 日我仍然係咁諗。
四月將到，FYP deadline 都開始接近。我一直都好用心去做好每一部分，但組員們懶散既態度，真係令我不敢恭維。細節已經唔想再提，我只想自己可以放低自己既執著：唔好再因為期望落差而瞓唔好，唔好再因為個 FYP 而勞氣，唔好再期望有咩好結果。
求主親自記念，記念我喺呢個 Project 既付出。
求主親自鑒察，何謂真正嘅「為主作美好見證」。
孤單
今個學期，我冇再去學傳既小組／聚會，因為時間真係唔夠用。返學、温書、揾工、返 E-Center、做 FYP、教會⋯⋯ 已經幾乎用盡 24 小時。另一方面，今個學期讀既 course 都冇咩熟人（Linux 同 Database，Linux 完全一個都唔識）。所以好多時都係自己食飯、自己做嘢、自己解決問題。
其實都幾悶、幾孤單。我諗我都要習慣下。
虛偽
好多人都問我揾工揾成點，面對熟既人，我會同佢講揾到工。但面對啲「比較心態」嚴重、唔熟、或者純八掛既人，好多時我會話「仲揾緊工」。因為我覺得，啲人成日問黎問去，心入面又要比較，真係好煩。特別係科大既人（同埋屋企既人）大部分嘅比較心都好重，問完又會問你人工點，人工高又話你勁，人工低就會扮同情你咁話「唔緊要啦，都係第一份工／你都唔睇人工」之類，諗起都煩死。
我都唔知自己咁樣係咪虛偽，畢竟神話要我地「是就說是」，而我又冇咁做。
掙扎
每一個人都會有自己既掙扎。我識既大部分人，佢地既掙扎都離唔開金錢、物質、虛榮、成就、知識同埋性慾。我相信，每一個人既掙扎雖然唔同，但其實同樣沉重，每個人都係「背起自己既十字架」走落去。對我自己來講，呢句金句都一直鼓勵我走落去。
至少，我唔走落去，都唔知仲可以做咩。
我亦唔想咁多人知到自己既掙扎。（既然其他人真係唔會明，無謂攪到人地咁沉重吖？）
其他
今日睇咗 Beauty and the Beast，
結果仍舊：同細個果陣一樣，睇完覺得好慘好想喊（但當然冇）。
唔打落去啦，攰。